Octobre rose, octobre morose

Den Oktober ass dee Mount, wou op de Broschtkriibs a seng Geforen opmierksam soll gemaach ginn. 
Verschidden Aktioune gi gestart, fir d’Leit op dës ganz hannerhällteg Krankheet opmierksam ze maachen an Donen ze sammelen fir dem Fleau entgéint ze trieden. Demno gesäit een iwwerall rosa Schläifen, vill Reklammen an et gëtt an alle Medien iwwert déi elle Krankheet geschwat.

All Fra oder Mann kann durech dës Aktivitéiten realiséieren, datt si oder hien direkt betraff ass. D'Opmierksamkeet gëtt och op genetesch Viraussetzunge geleet, fir u Broschtkriibs ze erkranken. 
All Patiente sinn dankbar, wa si mat der Zäit hiert Schicksal an d’Hand kënnen huelen!
Den immense Fortschrëtt an der Kriibsfuerschung brenge mat sech, datt de Broschtkriibs an de meeschte Fäll ganz gutt behandelbar ass an datt e frout Liewen no der Diagnos méiglech ass.

Leider ass dës Krankheet eng verbonn mat dem Enn vun der Onversiertheet. Operatiounen an Trätementer hannerloosse méi oder manner grouss Spuren um Ausgesi vun de Patientinnen a Patienten. 
Säit iwwer 50 Joer versichen d’Dokteren de Fraen dat terribelt Erliefness vum Broschtverloscht ze erliichteren, andeems si versichen d’Broscht oder d’Brëscht, esou gutt wéi méigelech, ze erhalen. Richtline ginn un, wat virgesinn ass datt de Verloscht esou kleng gehaale gëtt wéi et nëmme geet. Dës luewenswäert Initiative gëtt vu ville Fraen ugeholl.

Et ginn a goufen ëmmer Fraen déi deen, vun der Krankekeess finanzéierten a vun der Gesellschaft erwaarte Broschtopbau net wënschen. Dës Frae wëllen hir Broscht oder hir Brëscht net behalen a wëlle mat engem schéinen, flaach operéierten Torso durch d’Liewe goen.

Leider gi Fraen oft iwwerrumpelt vun hierer Diagnos a si kréien, tragescher Weis, just d’Broschtopbaumethode mat Volumen vun hiren Doktere virgeschloen. Dëst, obwuel et duerch eng geschéckt Operatioun méiglech ass e schéinen, flaachen Torso ze modeléieren. 

Fir datt d’Oktobere an deene Joeren no der Diagnos net moros ginn, fuerderen déi Fraen, déi flaach bleiwe wëllen, d’Optioun e schéinen, flaache Verschloss direkt bei der éischter Operation ze kréien. Dës Method soll an déi europäesch a lokal Richtlinien opgeholl ginn an natierlech vun der Krankekeess bezuelt ginn. Am Moment behaapten d'Krankekeesen an alle Länner datt dëst eng "Schéinheetsoperatioun"ass!

All Broschtkriibspatientin soll direkt iwwer all Méiglechkeeten informéiert ginn wéi si no hirer Operatioun kann ausgesinn. 
D’Virdeeler, d’Nodeeler an d’Risike vun all Method musse kloer verständlech duergeluecht ginn. D'Patientin musst opgeklärt an d'Operatioun goen! 
De Satz: “Mir maachen Iech Brëscht, déi vill méi schéi si wir Är eegen.”, dierft aus Respekt, net méi gesot ginn! 
Dat ass eng schlëmm Irreféierung an e Muechtabus fir d’Frae gleewen ze dinn, datt si ouni Brëscht net kënne séilesch bestoen an net méi gesellschaftsfäheg sinn.

Frae wënschen sech datt de rosaroude Brëll ofgedi gëtt an éierlech iwwert d’Resultater vun de jeweilege Méiglechkeeten geschwat gëtt, wéi eng Fra, munchmol e Mann, no dem Trätement ausgesäit. 

Et wäert e ganz schmierzhafte Moment ginn, mee et ass eng grouss Chance aus der Tabuzon erauszekommen an en immenst Gléck fir ganz vill Fraen, déi kierperlech a séilech ënnert hirem Broschtopbau oder mësslongenen Thoraxverschloss leiden.

Dir frot Iech: “Wat kënner MIR maachen?” 
Informéiert Iech, schwätzt mat Ären Dokteren iwwer Är Wënsch, behaapt Iech an Ärer Decisioun, wiert Iech géint eppes wat fier Iech falsch erschéngt. 
Huelt Afloss an Ärer jeweileger Positioun, fir datt d’Leitlinien zum Wuel vun de Frae emgeännert ginn. 
Interesséiert Iech fir dës ganz usprochsvoll Operationsmethod a léiert fir se, mat Respekt virum Patient, unzewenden.
Ennerstëtzt d’Fondation Cancer, fir datt si fir all Patientinnen a Patienten kënne schwätzen a si all moralesch bei hierer Wiel vum Ausgesinn ennerstëtze kënnen. 

All Patientinnen, fir déi den Oktober an di reschtlech Méint vum Joer mat Leed a Peng verbonnen sinn, soe Iech Merci fir Äert Engagement! 
Den Oktober soll och fir si “rose” sinn! 
20.09.2023